Solveig Aareskjold
Om synd og nåde
Vertskapet til den første hybelen min hadde vore kjærastar sidan tenåra og var det framleis, med fire barn og to jobbar. Dei utstrålte ein erotikk som fylte heile huset, og trakka likevel aldri over grensa mellom sitt og mitt.
Else var ei høgvaksen og avbalansert dame som arbeidde i trygdevesenet. Bernt var politimann, og så røsleg og breiskuldra at hadde han vore ein av dei medverkande i ein amerikansk tv-serie, ville han blitt oppfatta som ein usannsynleg karikatur. Han brukte heile kroppen når han snakka, særleg når han forklarte korleis han arresterte forbrytarar. Når det gjaldt leigebuarforholdet, hadde han berre ein regel, og det var at eg var fri til å ha kven som helst på besøk, dag og natt, så sant dei ikkje køyrde bil på plenen hans. For sjølv om innkøyrsla kan henda såg litt smal og kronglete ut, hadde han mælt opp nøyaktig kor mykje av tomta han måtte avsetja til grus.