Dagboka
Kuppet
Var det eit kupp i Trondheim Arbeidarparti då Trond Giske brått fekk kasta leiaren og vart sjølv vald til nestleiar, eller var det, som han hevdar, det motsette av eit kupp, eit demokrati? I jakta på makt må ein mobilisere, anten med reine eller skitne middel, for å få fleirtalet på si side. Giske har mobilisert medlemer over heile landet til Nidaros sosialdemokratiske forum, i motsetnad til alle andre arbeidarpartilag som har rekruttert lokalt. Slik har han fått eit klart overtak i medlemsdemokratiet i Trondheim.
Det er ikkje uvanleg å mobilisere alle krefter for å nå eit slikt mål. Vi såg Kjell Ingolf Ropstad utmanøvrere Knut Arild Hareide for å verte partileiar i Kristeleg Folkeparti og nominasjonskampane då Akhtar Chaudry verva ein haug med medlemmar like før nominasjonsmøtet der han og Heikki Holmås konkurrerte om å få møte i Stortinget for Oslo SV. Og der det er vinnarar, er det taparar. Som den amerikanske politikaren Dick Tuck sa etter å ha tapt eit nominasjonsval: «The people have spoken – the bastards.»
No er det årsmøtesesong, men det gjeld alle moglege organisasjonar, som supporterklubbar til norske fotballklubbar.
Martin Årseth