Til fyret: Dei vittige og opne samtalane mellom Agnes og Lydie (strålande spela av høvesvis regissør Eva Victor og Naomi Ackie) skjer i eit natur- og universitetsmiljø, som også gjev ekko av bøkene litteraturstudentane har lest. Foto: Ymer Media
Sorry, Baby
(USA, 2025) Regi og manus: Eva Victor Drama/ 1 t. 43 min./ Kino
Den endå ikkje 30 år gamle Agnes (Eva Victor) blir fast tilsett litteraturprofessor ved det mindre austkyst-universitetet ho vart uteksaminert frå for berre tre år sidan. Hennar avhandling om novellekunst var «ekstraordinær», ifølgje rettleiaren professor Preston Decker (Louis Cancelmi). Med sin kunnskap – ofte formulert som komiske paradoks, sin ungdommelege sensibilitet og si avvæpnande uformelle og keitete framtoning – alltid i barn jacket, er Agnes godt likt både blant dei fast tilsette og Gen Z-studentane. Likevel er ikkje lynkarrieren eit uttrykk for sutlaus suksess i livet eller eit resultat av ufortent favorisering slik Agnes’ innbitne akademiske rival Natasha (Kelly McCormack) trur.
Proff: Kaptein Walker (Rebecca Ferguson) er personifisert statleg krisekompetanse i ein film som minner om at internasjonal tillit er vårt einaste mottiltak mot atomvåpen. Foto: Selmer Media / Netflix
A House of Dynamite
(USA, 2025) Regi: Kathryn Bigelow Manus: Noah Oppenheim Thriller/ 1 t. 52 min./ Kino, Netflix frå 24. oktober
Ein atomrakett blir – uventa og med ukjent avsendar – oppdaga på veg mot USA. I løpet av minutt må landet si militære og politiske leiing erkjenna alvoret, aktivera nasjonal beredskap og ta stilling til ein eventuell kjernefysisk respons. Det siste utan å vita kven fienden er, utan å kunne ana kva dominoeffekt eit motåtak vil gje.