Første veka i juni vart eg vitne til ein diskusjon om ti tusen syriske flyktningar kunne reknast som ein drope i havet eller ei. Det handla sjølvsagt om ein metafor, henta frå ei hyppig delt nyhendesak frå starten av månaden. «– Blir bare en dråpe i havet å ta flyktninger til Norge» var overskrifta (NRK, 4. juni), der Arnulf Torbjørnsen, tidlegare leiar i Leger utan grenser, var kritisk til framlegget om å ta inn ti tusen syriske flyktningar over to år, tidlegare fremma i ein kronikk av Amnesty, Raudekrossen og seks andre organisasjonar. Torbjørnsen meinte det var betre å hjelpe flyktningane der dei var.