Solveig Aareskjold 27. juli
Å slå Trump Så gav han seg til slutt, Joe Biden, etter å ha hange etter neglene altfor lenge, etter å ha klort seg fast i gardinet som ein katt som ikkje vil hivast ut. Ein fullt oppegåande person ville ha overlate det til det demokratiske partiet å avgjera kven som skulle vera kandidat ved det amerikanske presidentvalet i haust. Ved å påstå at han trass i den høge alderen sin var i så fin form at han heilt sikkert skulle kunna halda det gåande i fire år til, demonstrerte han kor dårleg skikka han var. Først då han fekk covid, steig han tilbake til fordel for visepresidenten Kamala Harris.
Den andre skrøpelege oldingen som siktar mot presidentembetet, Donald Trump, han fekk eit streifskot gjennom øyret og gjekk viralt i heroisk positur. No sluttar republikanarane endå tettare opp om han, og han nærer seg av den energien som dei utsondrar og er nesten litt lettare i steget enn då han stabba inn i Det kvite huset for åtte år sidan.
Kamala Harris er tøff, seier dei, og det er slett ikkje utenkjeleg at ho kan driva Trump på retrett ved å slå raskare og hardare enn han. Hillary Clinton, som prøvde å få han til å skamma seg ved å heva seg frøkenfint over han, har i alle fall vist oss korleis det ikkje skal gjerast.