Kulturkrig om Vietnam

Filmskaparen Park Chan-wook er kjent for valdelege og visuelt elegante puslespelmysterium som «Oldboy» og «Decision To Leave». Den sørkoreanske regissøren – oppvaksen under sterk sensur i ein nasjon kløyvd av kaldkrigsrivalisering – lagar sjeldan eksplisitt politiske filmar. Kriminalhistoriene, som er fulle av paranoia, skjulte motiv og villeiande vitnemål, fortel likevel noko om samfunnet dei er skapte i. Park burde med andre ord ha gode føresetnader for å filmatisera «The Sympathizer», Viet Thanh Nguyens Pulitzer-vinnande spionroman om Vietnamkrigen eller krigen mot Amerika, som han heiter i Vietnam. «The Sympathizer» kombinerer nemleg desse motsette perspektiva.