Nyfrelst av kjernekraft

Oliver Stones entusiastiske kjernekraftdokumentar kjem på norske kinoar akkurat i det den heimelege debatten om nye energikjelder, er i ferd med å opna seg. På grunn av vasskrafta, i tillegg til olje og gass, har Noreg aldri trengt å vurdera kjernekraft på alvor. Det leiande forskingsmiljøet ved Kjeller-reaktoren vart gradvis strupt for ressursar, og inntil nyleg har få, oppdaterte vurderingar av kjernekraft nådd allmenta. Tsjernobyl-ulukka i 1986 sementerte ei utbreidd oppfatning av risikoen ved kjernekraft, og den enno mykje brukte nemninga atomkraft speglar ein stabilt høg motstand mot kjernekraftverk, men opinionen er i pragmatisk endring.