Block to Block

Kva er ein heim om ikkje ein stad der du kan kjenna deg trygg. Og kva er eit samfunn om ikkje ein felles heim, folkhemmet , som svenske sosialdemokratar sa før. Heim og folkeheim er dei to omgrepa som er sett på spel i Aslaug Holms Oslo-dokumentar «Blokka», ein film som gjennom fleire år følgjer leigebuarane i Maridalsveien 128 og deira kamp for å få kjøpt leilegheitene sine ved lovfesta forkjøpsrett. Den retten vart forpurra i Oslo Rådhus, ifølgje leigebuarane, då kommunen i 2016 selde garden til eigedomsinvestor Ivar Tollefsen, som straks varsla bebuarane om utkasting, totaloppussing og eventuell framtidig leige til marknadspris.