Berga brør eller forviste fiendar?

Den russiske «spesialoperasjonen» i Ukraina har vorte legitimert som ein «bergingsaksjon», og difor har invasjonshæren evakuert eit uvisst tal sivile ukrainarar til Russland. Mange har reist friviljug, men flyktningar frå Aust-Ukraina har også, blant anna til BBC, fortalt om «tvangsevakuering» til Russland. At dette skjer, har også den ukrainske forfattaren Andrej Kurkov hevda fleire gongar. «Det russiske militæret tek frå dei ukrainske pass (…), set dei på bussar og køyrer dei til Russland. Dei får eit papir som seier at dei pliktar å halde seg i Russland i to år. Og etter det vert dei sende til Sibir og det fjerne Austen, der folkesetnaden har minska i årevis», skreiv han i Dag og Tid 25. mars.