Jaktar det kvite gullet

Få mil søraust for Torino ligg landkommunen San Damiano d’Asti. Namnet smakar av vin, og ganske rett. Dette er midt i Piemonte, og vinrankane veks på geledd i bratte terrassebruk. San Damiano er likevel i første rekkje kjent for det som veks nedi jorda, i den ulendte og på vinteren gjørmete skogen: den kvite Alba-trøffelen. Ein delikatesse folk i distriktet har «jakta» på i uminnelege tider – i lag med dei spesialtrente hundane sine. Hundar som et på herrens bord og jamvel blir velsigna ved altarringen i katedralen. Trøffeljakt er mykje meir enn matauk og attåtnæring. Ikkje ein gong gode moltemyrer i Finnmark er slike familieløyndommar, eller regulert av så mange uskrivne normer og sosiale sanksjonar som trøffelplassane i Piemonte.