Fotball er livet

For andre år på rad er Norway Cup avlyst på grunn av koronapandemien. Fotballturneringa, som vanlegvis set sitt preg på Oslo den første veka i august, er tilbake på Ekebergsletta til 50-årsjubileet i 2022. I mellomtida kan ein sjå Line Hatlands fine dokumentar «Bortebane», som også har venta eit år på å koma ut til publikum i opne kinosalar. Filmen vart tatt opp i 2019 og følgjer fem unge frå ulike nasjonar, alle jenter og gutar i 14-årsalderen. Jamvel om det var den konkrete turneringa som stod i hovudet på desse deltakarane der og då, er sjølve dokumentaren tematisk tidlaus og står seg svært godt.