«Gode verdiar»

Fjerde sesong av ungdomsdramaet som har fått sesongtitlar etter alderen på sine skiftande hovudpersonar – «17», «18» og «16» – har med «19» kome til endes både i tenåra og i den sterkt malstyrte serien. Medan dei tre første sesongane har vendt seg mot og handla om tenåringsgutar på Oslo aust (handlinga har ankerfeste på Stovner), blir den avrundande skildringa av eit meir og mindre samanknytt venemiljø sett gjennom augo til den sentrale jenta i serien, Aisha (Inas Alshimerty). Til no har ho vore kjent som love interest for Emrah (Serhat Yildirim), den sjarmerande, sårbare og svært upålitelege «gangsteren» som bind alle sesongane saman. Aisha skiftar det interne perspektivet i forteljinga, men som klassisk pubertetsdrama om identitet og lausriving, filtrert gjennom fleirkulturelle og spesifikt muslimske røynsler, følgjer «19» kjende konfliktaksar. Det handlar om å frigjera seg frå sosial kontroll utøvd av foreldre, brør og kjærastar, eit tema ikkje minst Iram Haq har løfta fram i norsk film tidlegare. Men det er òg noko nytt her, for Aisha – som tilsynelatande har ein prestisjetung yrkeskarriere som dommar i sikte – styrar også mot ei brutal erkjenning av at ho alt har tatt rolla som dobbeltmoralistisk dommar overfor venene sine. Til liks med dei førre sesongane er «19» eit nedteljingsdrama, der tittelen også gjev talet på dagar historia utspelar seg i.