Den definitive Pinocchio

Ber Pinocchio den italienske folkesjela? Filmskaparen Matteo Garrone er blant dei som meiner det. Han har heilt sidan gutedagane vore fascinert av historia om tredokka som ønskjer å bli menneske, men som ikkje har tolmod til noko som krev sjølvdisiplin. Støtt mister Pinocchio målet av syne, og lèt seg freista av enkle gleder som blir dyrekjøpte lærdommar. Og når han lyg om sine brotne lovnader til dei som elskar og hjelper han, veks nasen hans.