Vegfarande fabulist

Salman Rushdie

Quichotte

Roman

Omsett av Ingrid Haug

Aschehoug 2020, 462 sider

Verda har gått av hengslene, mønsteret raknar, fornufta forfell. Kva slags litterær skikkelse er betre eigna til å spegle oppløysingstendensane i vår tid enn Don Quijote – dei villfarne illusjonars ridande ryttar til hest? Svært mange, kunne ein ha svara, all den tid vrangførestillingar sjeldan er klårast sett av den som sjølv lid av sinnsforvirringar. I «Quichotte» har likevel Salman Rushdie valt seg Miguel de Cervantes’ romanfigur som ein virrande peilepinne i det han kallar «Alt-kan-skje-æraen». Han møter kaos med kaos, og løgner med skrøner og fiksjon: «[D]et er det surrealistiske – ja, sågar det absurde – som nå potensielt tilbyr de mest nøyaktige beskrivelsene av det virkelige liv», seier ein av romanpersonane.