Utanfor sesong

Etter å ha lese den nye novellesamlinga til Frode Grytten, treng eg berre kike på titlane før det dukkar opp nakne menn på netthinna mi. I ‘Andersen, Anders’ skil foreldra til forteljaren lag, og far hans byrjar spele inn vaksenfilmar i sin eigen barndomsheim. Forteljaren i ‘Kokepunkt’ meiner at japanske menn (som han berre har sett i vaksenfilmar) er sveitte og ekle «med alle typar perverse opplegg på gang». I ‘Ytre karakteristika’ blir forteljaren mistenkt for valdtekt, og kjønnsorganet hans kalla inn til fotografering hos politiet. Vitne har sagt at pikken hans har ytre karakteristika som blir «endå meir tydelige i erigert form», og lesaren kan berre tenkje seg korleis seansen går føre seg: «Er det autofokus? ropte betjenten inn til lensmannen».