Fint vêr er overvurdert, og dårleg vêr er veldig undervurdert. Denne påska ser ut til å bli ei av dei dårlegaste på lang tid på Vestlandet, men då er det viktig å hugse på at det ofte går heilt fint å kome seg ut på tur sjølv om det regnar, bles eller er surt og kaldt. Faktisk kan det kome store naturopplevingar ut av det. Og ofte dukkar det opp fine periodar også på dagar som i utgangspunktet er grå og triste. Du må ikkje sjå deg blind på vêrmeldinga. Den skjuler ofte glimt av sol bak dei mørke skyene. Kanskje burde Yr vurdere å justere fargen på regnskyene til ein litt lysare farge, slik at dei ikkje skremmer folk til å bli sitjande heime.