Onsdag fekk NRK fortent refs i Kringkastingsrådet for nettserien «Norske beefer», som hentar fram og presenterer kranglar mellom unge, norske påverkarar på Tiktok. NRKs eigen etikkredaktør må ha sove på jobb den dagen det aktuelle avsnittet, «Cum i fjeset», vart lagt ut. Kringkastingsrådet var innom dei fleste, viktige innvendingane mot episoden, inkludert svært kritikkverdig eksponering av ein mindreårig. For vaksne som har sett litt på «Norske beefer», er det oppsiktsvekkjande at eit organ som Kringkastingsrådet ikkje har drøfta denne ungdomssatsinga før. I nettspelaren til NRK blir det nemleg reklamert for kranglane med orda «Det blir stygt. Og gøy». Det er nærast ein lovnad om å oppsøka det etisk problematiske der «gøy» ser ut til å skulle legitimera «stygt».