Å vinna Oscar er for mange å realisera ein draum ganske lik «den amerikanske draumen», ide(ologi)en som så mange vinnarfilmar har målbore. Det var også eit poeng i fleire tårevåte talar natt til i går. Mest ekte kjendest det kanskje då Ke Huy Quan takka etter å ha fått prisen for beste mannlege birolle. Den tidlegare vietnamesiske båtflyktningen og barnestjerna («Indiana Jones og de fordømtes tempel», 1984) fekk ein av dei sju Oscar-prisane som gjekk til multivers-eventyret «Everything Everywhere All at Once». Oscar 2023 vart eit av desse prisåra då ein film nesten gjer reint bord i dei mest prestisjetunge kategoriane.