Freia brukte i si tid slagordet «Til sindets munterhet». Ein rimeleg reklame for søtsaker, som ikkje prøvde å lata som at produktet var helsekost. Både slagordet og sjokoladen melder seg i minnet når ein ser Pixars sommarferiefilm «Luca». Her handlar det enkelt og greitt om to livselskande turistar litt utanom det vanlege – gutane Luca og Alberto – og deira opplevingar på sjølvstyr i fiskarlandsbyen Porto Rosso (uttalt med italiensk rulle-r, medan den som snakkar lagar ein klype-gest med fingrane).