«Klipp håret og få deg arbeid!» Den gamle formaninga har meldt seg, medan vi har hatt høve til å studera den veldokumenterte framvoksteren av Abid Rajas koronasveis. Samstundes som resten av regjeringskollegiet har snakka om reproduksjonstal og online-undervising, har kulturministeren snakka om håret. Men sist veke stod vår udiskutabelt mest sveisne regjeringsmedlem først i køen, då frisørane opna att. Og sanneleg: Han hadde ikkje før gått nyklipt ut der frå, før han kom med årets mest kjærkomne kulturpolitiske utspel, nemleg at det ikkje blir noko av regionreforma på kulturfeltet!