Det er smigrande for ein forfattar (og lokkande for arvingane), at ein Hollywood-produsent vil laga film av litteraturen hans/hennar. Men som vi veit, gjev ikkje sal av filmrettar ein betalt billett til å få sjå teksten sin levandegjort på lerretet. Av og til kan det beint fram vera vanskeleg å kjenna att sine eigne åndsverk. Hadde tekstforfattar Munro Leaf og illustratør Robert Lawson levd i dag og sett Twentieth Century Fox’ «Ferdinand», vil eg tru dei hadde vore i denne kategorien av vantru opphavsmenn. Det trass i at dei lét bestseljarboka «The Story of Ferdinand» (1936) gå gjennom ei av filmhistorias tidlege «disneyfiseringar» alt i 1938.