Med hjelp av ny og svært nøyaktig teknologi kan vi no måle landskapet på eit ufatteleg detaljert nivå. Mykje av denne teknologien deler sentrale fellestrekk med dei seinaste, langt meir omdiskuterte militære nyvinningane som dronar og ulike former for fjernanalyse med satellitteknologi. På same måte som det no er teknisk mogleg å føre avstandskrig mot individuelle menneske, er det også mogleg å måle og evaluere naturvernsområde, avskoging eller dyrebestandar heilt ned til det einskilde treet eller dyret, utan å måtte vere i kontakt med sjølve naturen.