Draumen om fortida er like uforpliktande som draumen om framtida. Ei beinflis her og ein tannstump der er nok til å dikta opp heile livshistorier, og den allmenne interessa for genetikk og evolusjon har skapt ein stor marknad for useriøse forteljingar om fortidsmenneska. Likevel verka det solid underbygd då BBC-serien Ancient Autopsy kunngjorde at den digre knokkelen i den høgre overarmen til ein neandertalmann ikkje kunne ha blitt sånn av å køyra spyd inn i mammutar. Praktisk utprøving har vist at denne jaktteknikken ikkje røyner så mykje på høgrearmen at det kan forklara auken i beinmasse. Årsaka må derfor liggja ein annan stad.