50 reinhaldarar som til dagleg held Aker Solutions på Stord reint, er for tida tatt ut i streik. Men samstundes som reinhaldarar i selskapa 4 Service og Toma Facility, som jobbar for Aker Solutions, streikar, har Aker Solutions inngått avtale med eit anna reinhaldsfirma og får mykje av reinhaldet likevel utført.
Norsk Arbeidsmansforeining, som er i streik, reagerer kraftig på at eit anna selskap, som ikkje er i streik, er henta inn for å utføra reinhaldet.
– Det er djupt umoralsk, seier forbundsleiar Brede Edvardsen i Norsk Arbeidsmandsforbund (LO), der i overkant av 800 medlemmar streikar.
Avisa Sunnhordland omtalte saka fyrst.
Ifølge Edvardsen er ikkje Aker Solutions aleine om å henta inn andre selskap til å utføra streikebelagt arbeid.
«Me er i ei gråsone.»
— Brede Edvardsen, leiar i Norsk Arbeidsmandsforbund
– Dette er omfattande. Me får mange rapportar om det kvar dag. At NHO-organiserte bedrifter tilbyr å utføra streikebelagt arbeid for konkurrentane som er i konflikt, synest me er hårreisande, seier han.
Også Verkstadklubben i Aker Solutions, som organiserer medlemmar i Fellesforbundet, har reagert kraftig.
Er i ei gråsone
Fordi Aker Solutions kjøper reinhald hos ein underleverandør og ikkje sjølv er i konflikt med Norsk Arbeidsmandsforbund, dreier saka seg ikkje om streikebryting, juridisk sett, ifølge Edvardsen. Det ville det ha vore dersom reinhaldarane jobba for Aker Solutions.
– Me er i ei gråsone. Me meiner at dette ikkje er innanfor, sjølv om det ikkje er straffbart. Eg synest at Aker Solutions kunne latt vera, seier Edvardsen.
– Er dette så omfattande at streiken ikkje har effekt?
– Den har effekt, men den blir svekka ved at streikebelagt arbeid blir utført. Me kan ikkje gjera så mykje med det, men me er ikkje glade for det.
– Reinhald er avgjerande
Odd Naustdal, kommunikasjonssjef i Aker Solutions på Stord, stadfestar at dei har henta inn ein ny leverandør av reinhald mens selskapa dei normalt brukar, er i streik.
– Me meiner me er innanfor spelereglane for arbeidskonflikt når ein sjølv ikkje er part i konflikten. Me har respekt for at det er ulike syn rundt dette, seier Naustdal og legg til:
– For vår del handlar det om å ta i vare forsvarleg drift og HMS ved verftet på Stord. Me har sendt folk på heimekontor og stengt fleire kantiner og kontorbygg, men me må gjera det som skal til for å ha forsvarleg drift og vidareføra prosjektaktiviteten, seier han.
– De kunne ikkje hatt verftet i gang utan dette reinhaldet?
– Det er vanskeleg å spekulera i konsekvensar. Reinhald er avgjerande for å drifta den store operasjonen me har.
– Det viser kor viktig reinhaldarane er?
– Ja, absolutt.
Stord Reinhald AS er selskapet som er leigd inn av Aker Solutions mens streiken held på. Dagleg leiar Solveig Skulstad ønsker ikkje å kommentera saka.
Krev forskottering
Det er kravet om at arbeidsgivar skal forskottera for sjukepengar, som har utløyst streiken i reinhaldsbransjen – slik som i restaurant- og hotellstreiken.
Det har lenge vore ei vanleg ordning i store delar av norsk arbeidsliv at arbeidsgivar forskotterer for sjukepengar og får pengane refundert av Nav når sjukepengesøknaden er handsama. Fellesforbundet gjorde saka til eit hovudkrav i årets lønnsoppgjer og fekk gehør hos Norsk Industri i frontfagsforhandlingane. Også i andre oppgjer har retten om forskottering av sjukepengar komme på plass i vår.
I Aker Solutions har det vore praksis å forskottera for sjukepengar også før det blei ein rett i tariffavtalen.
