Automatikk

Ego

Det har seg slik at eg er i ein bustadkjøpsprosess. Eg ønskjer i alle fall å vere det. For eg har godsnakka med banken, spart jamt og trutt sidan eg var konfirmant, så i teorien er alt lagt til rette for å kjøpe meg ein bustad i nærmaste framtid. Men fleire ting gjer at saka ikkje er så enkel. Eg har eit studielån på ein halv formue som set meg tilbake. Eg er også singel (og eg har så mange søsken at det å ha ein forelder som medlåntakar, er uaktuelt), så eg står åleine i det økonomisk. I praksis betyr det at eg kanskje har råd til prisantyding, men så kjem omkostnadane og fellesgjelda på toppen som gjer at eg er ute av spelet før det første mottilbodet har kome. Kva gjer ein då? Eg vurderte å ta kontakt med min homeboy Røkke for å sjå om han kunne avsjå ein av dei 500 millionane han skal gi til Molde og omegn sidan eg er moldensar, og då gir det kanskje litt meining å dele endå meir på goda? Rause mannen.