Tillit

Førde

Det er ikkje berre å flytte til Førde, sa klubbleiar i Fredskorpset Marianne Jorddal med forakt i røysta då eg intervjua henne for Dagsrevyen i 2017. Same dagen hadde dei tilsette der fått beskjeden om at kommunalminister Jan Tore Sanner med tvang skulle flytte Fredskorpset frå Oslo til Førde, og dei tilsette var både sinte og i sjokk. Men klubbleiar Jorddal flytta faktisk til Førde, Fredskorpset var døypt om til Norec, og det heile vart ei suksesshistorie. Det synte seg at det gjekk heilt fint å drive eit forvaltningsorgan i Utanriksdepartementet frå Sunnfjord. Og medan det å miste 53 arbeidsplassar for folk med samfunnsvitskapleg kompetanse ikkje betyr noko i det heile teke for Oslo, så betyr det svært mykje for Førde å få tilført det. Å nytte politikk på den måten for å fordele kompetansearbeidsplassar kringom i landet er sosialdemokrati på sitt beste, men det er mest berre under borgarlege regjeringar at det vert teke slike grep. Det er fordi det er ekstremt upopulært i fagforbunda som organiserer dei tilsette. Heile Førde er eigentleg ein sosialdemokratisk konstruksjon. I 1960 var det ei landbruksbygd med kring tusen innbyggjarar.