17. feb.
Milliardsluk Heile to milliardar kroner er brukt på prestisjeprosjektet Hordfast, ei ferjefri vegutbygging med ei bru på fem kilometer over Bjørnafjorden, ein dryg halvtime sør for Bergen. Og endå er det ikkje bygd ein centimeter veg for pengane, ifølge NRK.
Det vil seia, minst to milliardar. For tala er frå i fjor vinter, og Samferdselsdepartementet har ikkje komme opp med oppdaterte tal til NRK.
Og om det som kan bli verdas lengste flytebru nokosinne kjem over Bjørnafjorden, er høgst uvisst. I fjor var ikkje gigantprosjektet lenger prioritert då Stortinget rullerte Nasjonal transportplan, sjølve grunnboka for norsk samferdselspolitikk.
Mens Statens vegvesen har stor tru på prosjektet, som dei meiner vil bli det mest lønsame vegprosjektet som finst i landet, vil andre helst setta ein endeleg punktum for det dei ser på som eit gigantisk sløseri, som mange tapar på. Ikkje berre vil vegutbygginga innebera årevis med høge bompengar for bilistane som skal bruka vegen – det vil også gå med store inngrep i naturen.
Det som likevel synest som ganske sikkert for dei som har vore tilskodar til saka over tid, er at dei som jobbar for dette prosjektet, ikkje vil gi seg. Det er mange på Vestlandet som kjem til å slåst for denne brua og vegen i mange år endå, uansett kor langt ned på prioriteringslista dette prestisjeprosjektet kjem.
Anne Kari Hinna