I ein kommentar i Klassekampen 26. november spør Per-Odd Eggen: «Når barna våre skal lære å tenke kritisk, skal det også være på anvisning fra de samme bedreviterne?» Eg vil svare eit klart ja! Når ein skal lære seg å tenkje kritisk, må ein trass alt ha noko å tenkje på, og noko å vere kritisk til. Kva dette noko skal vere, må bestemmast av nokon. Og her er det nyttig med betrevitarar, i alle fall om Eggen med det siktar til høgt kompetente fagfolk.
Ingen kan klare å ha full oversikt over eit heilt fagfelt på eiga hand. Langt mindre fleire fagfelt på ein gang, som dei fleste lærarar må forhalda seg til. Eit felles fagleg rammeverk ein kan sjå til, med konkret fagleg innhald heller enn metodetvang, er soleis nyttig som både rettleiing og inspirasjonskjelde. Det gir ein til og med noko å vere kritisk til, om ein måtte ønskje det. Og når eit slikt rammeverk skal utformast så blir også Eggen sine betrevitande fagfolk gode å ha.
