I Førde vert det no lagt ark på frontrutene til folk dei blir oppmoda om å boikotte alle butikkane til Coop, og folkeaksjonen ser ut til å spreie seg og få stor oppslutnad.
Matvarekjeda Coop har kutta avtalen med den lokale brødprodusenten Naustdal dampbakeri, for å heller satse på sitt eige, nye sentralbakeri der dei vil masseprodusere brøda sine sjølv. Det same skjer fleire andre stader, og det er ein del av ein trend der matvarekjedene satsar meir og meir på å lage sine eigne produkt.
Naustdal dampbakeri vart starta av Ole Berntsen i 1888, og i dag er det oldebarnet hans Martin Berntsen som driv det. Dei har 130 tilsette, og driv fleire kafear i både Førde og Florø i tillegg til brødbaksten. Leiinga i bakeriet har sagt at dei må seie opp ganske mange på grunn av tiltaket frå Coop, og lokalbefolkninga ser ikkje ut til å akseptere det.
Det er vanskeleg å sjå for seg ein effektiv boikottkampanje i Oslo viss Coop hadde slutta å selje osloprodukt som Ringnes eller Freia, så saka syner kor mykje meir kraft som ligg i eit samfunn som er litt mindre.
Den syner også kor vanskeleg det byrjar å bli å skilje dei gamle samvirkelaga i Coop frå konsern som Norgesgruppen og Reitan. Coop er framleis utan kapitalistiske eigarar, men dei demokratiske strukturane i samvirket er så utarma at lokalbefolkninga har lite dei skulle ha sagt.
