Lenge trudde folk at det var fysisk umogleg for eit menneske å springe ei engelsk mil (1609 meter) på mindre enn fire minutt. I 1954 klarte den engelske idrettsutøvaren Roger Bannister endeleg det då han sprang på 3 minutt og 59 sekund. Ni år seinare sprang Einar Førde ein 1500-meter på 3 minutt og 50 sekund og tok sølv i NM i friidrett. Det er litt meir enn hundre meter kortare enn ein engelsk mil, og Førde hadde eit litt lågare tempo enn Bannister. Han var likevel berre eit sekund frå å ha den hastigheita du treng for å springe ei engelsk mil under fire minutt, og det syner vel kor raskt utviklinga friidretten gjekk på den tida at han likevel berre tok sølv.
Einar Førde må vel med god margin vere den sprekaste politikaren vi har hatt i Noreg, men ei sikker kjelde har sagt til Klassekampen at Jonas Gahr Støre har sprunge eit halvmaraton på ein time og 36 minutt. Kjelda er Jonas Gahr Støre sjølv. Det er veldig bra, men er likevel på eit mosjonistnivå. Einar Førde kunne jo truleg ha satsa på å blitt profesjonell idrettsutøvar om han hadde ønska det.
Førde sprang for vestkantklubben Tjalve, som er arrangøren av verdas største løpsarrangement, Holmenkollstafetten. På spørsmål om kvifor han ikkje heller sprang for den legendariske klubben Idrottslaget i Bondeungdomslaget i Oslo (IL i BUL), skal Førde ha svart at nynorskfolk og bygdefolk såg han allereie meir enn nok av.