Selve Dagen

Korona

I mars 2020 skreiv dåverande politisk redaktør i Dagsavisen Lars West Johnsen ein mykje delt kronikk der han skildra folk som jogga i offentlege parkar under korona, for «jævlige» og «egoister». Samstundes synte ein rapport frå Kina at av 7324 smittetilfelle så hadde berre eitt (1) av dei spreidd seg mellom folk som var utandørs. I mai 2020 konkluderte amerikanske styresmakter med at ein ikkje trengde å vere redd for smitte utandørs, og det gjorde etter kvart også andre land. Likevel haldt mange vanlege folk fram med å vere redde for smitte utandørs, og i lang tid var idrettstreningar og utepils avlyst utan rot i realitetane. Det same skjedde på ei rekkje område. Folk haldt fram med å skrubbe bordflatene fem gonger, sjølv om det allereie i mai 2020 vart rapportert om at korona ikkje overlever lenge nok til å spreie seg via overflater. Og skulane vart stengde lenge etter at store studiar frå Sør-Korea og Frankrike synte at ungar nesten ikkje spreidde viruset, og det difor ikkje var naudsynt. Det er lett å vere etterpåklok, men det må jo vere betre å vere etterpåklok enn etterpådum. Ein ting som irriterte meg veldig under korona, var at VG insisterte på å skrive corona.