Aleksander Åsnes 30. nov.
Jordskjelv Eit av dei fremste kjenneteikna på eit jordskjelv som vert målt til meir enn 4 på Richters skala, er at folk får det med seg. Det kan også føre til nokre skadar på bygg, men først og fremst er det kjenneteikna ved at folk flest legg godt merke til det.
Berre høyr kva Vivian Arntsen seier til avisa Firda etter jordskjelvet på 4,1 i Sunnfjord på onsdag: «Eg småduppa på sofaen då det begynte å bråke og rista. Putene datt ned frå sofaen, julestjerna rista, og juletreet svaia. Det var rett og slett skummelt.» Sjølv var eg heilt ytst ute i Dalsfjorden då jordskjelvet fann stad, mykje nærare episenteret enn Vivian Arntsen. Og sjølv om eg slettes ikkje låg å duppa på sofaen så tidleg på dagen, merka eg ingenting.
Dette har fått meg til å lure på om det faktisk kan hende at eg eksisterer i eit parallelt univers, og at jordskjelv difor ikkje påverkar meg. Ved nærare ettertanke har eg nemleg kome fram til at eg aldri har opplevd eit einaste jordskjelv.