Aksjegaloppen

Den strenge pandemihausten 2020 brygga det opp til eit finansopprør mot Wall Street blant amerikanske småspekulantar. Opprøret var det første i sitt slag som sprang ut av sosiale medium, det gav amerikanske finansstyresmakter ein støkk og fekk konsekvensar for nokre av hedgefonda som dominerer børshandelen, men det er ei sterk overdriving at det var ein revolusjon, slik den tidvis både informative og underhaldande komedien «Dumb Money» langt på veg hevdar. Wall Street-makta vart ikkje skipla eller innskrenka. Og jamvel om filmen viser korleis milliardærar med politisk påverknadskraft i Washington slepp unna med trugsmål og ulovleg marknadsmanipulasjon, er det tvilsamt om «Dumb Money» kan motivera publikum til å krevja regulering, men «alle» liker å sjå kyniske kaksar få ein på nasen.