Slår inn opne dører

I sommar vart det politiske Kristiansand sett på hovudet då Fædrelandsvennen oppdaga at ein lokal filmprodusent hadde fått støtte frå kulturstiftinga Cultiva til prosjektet «Perleporten». Ifølgje søknadspapira skulle det blir ein satire om kommunevalet i byen i 2019. Det var illevarslande nok for mange, då det var året Facebook-sida «Sørlandsnyhetene» splitta byen og skapte nasjonal furore. Like etter vart det slept ein trailer for filmen, med bilde av det som tilsynelatande var ein nyfrelst, onanerande og spelegal netthandelgründer med politiske ambisjonar. Sørlandsnyhetene vart grunnlagt av Blivakker-gründer Einar Øgrey Brandsdal, og filmteaseren førte til at fleire kommunestyrepolitikarar i Kristiansand byrja å snakka om «mobbing» og uttrykte ønske om å få filmen trekt. Med eitt hadde dei ein prinsipiell kunst- og ytringsfridomsdebatt i fanget, som vanskeleg kunne vinnast. Og enno hadde ingen sett filmen.