Nidstonga

Det er eksamenstid, og ein skulle tru at skulane og sensorane hadde skarpt fokus på å hindra chatbot-juks. Oppsiktsvekkjande nok er det ikkje kunstig intelligens, men heilt alminneleg intelligens, eller mangel på slik, det blir slått hardast ned på. Høgskolen i Innlandet har utestengt ein student i to semester for å ha plagiert seg sjølv på ein konteeksamen. Studenten siterte frå den underkjente eksamenen då ho freista å forbetra resultatet. Dette meinte høgskolen var juks, og sist veke tapte studenten ei sak mot Kunnskapsdepartementet i tingretten for å få omgjort utestenginga. Det dreier seg altså om bruk av avsnitt ho sjølv har skrive på ein eksamen som vart avvist. Vi seier oss samd med litteraturprofessor Gisle Selnes, som seier til Khrono at «saken virker helt vill». Ifølgje Selnes strir vedtaket «mot det som har vært praksis i hele min tid som sensor og underviser». GK