Politi til lyst

Trekantdramaet «My Policeman» er (uvørdent sagt) ein slags «Brokeback Brighton», der den tidlegare kriminaliseringa av homofili viser seg å ha formørka liva til og splitta det som ein gong var tre vitale vener. Handlinga går føre seg på to tidsplan. Den formative og pasjonerte fortida, slutten av 1950-talet, slår inn i den somnambule notida, 1999. Det skjer når pensjonisten Marion (Gina McKee) insisterer på at ho og ektemannen Tom (Linus Roache) tar inn ein slagramma ven, Patrick (Rupert Everett), som dei ikkje har sett på tiårsvis. Ved hjelp av Patricks dagbok får Marion – og vi – tilgang til detaljane i historia om Tom og Patrick.