Om å velje landbruk

Eg kjem frå eit mjølkebruk på Voss med cirka 350.000 i kvote, mjølkerobot, støl, utmark og eldhus. Det er ein flott gard, med vakre fjell rundt om og sol til klokka 23 på jonsokaftan. Go’far var på høgget og bygde lausdrift saman med far min og systera hans allereie i 1982. Jorda er næringsrik og moldrik. Her veks det godt gras til dyra, og potet og kålrabi til oss. Det vene og fagre med Voss, fjella og liene, kjem med ei bakside for oss bønder. Det er litt bratt, og ikkje alltid heilt lett å lage til eit godt såbed, gjødsle, så og hauste med stort utstyr. Men her vil eg bu, og denne jorda vil eg dyrke.