Svakt fullført

Om det er noko mange foreldre og barn kunne tenkt seg på tampen av eit rart og slitsamt år, er det ein god, norsk familiejulefilm. «Dragevokterens jul» verkar lovande: Like oppunder jul i den hendingslause småbyen Kjedly møtest to einsame elleveåringar, den mislukka Youtube-stjerna Mortimer (Iver Aunbu Sandemose) og «innbrotstjuven» Sara (Isha Zainab Khan), som tilsynelatande er på flukt frå politiet. Mortimer (sonen til rektor) har falle gjennom alle skolens venenettverk, og Sara har ramla utanfor heile samfunnsfellesskapen, men no finn dei to kvarandre gjennom å hjelpa ein skapning som verkeleg er frå eit framand univers. Ein drake frå det varme indre i Kjedlys djupe og for lengst stengde gruver.