Landsby i skyene

Mange vil hugsa historia om Mats Steen, den unge mannen med Duchennes muskeldystrofi, ein sjeldan sjukdom som fører til muskelsvinn og tidleg død hjå gutar. Mats sat i rullestol frå han var åtte år og kunne ikkje ta del i vanleg leik og sosialt liv med klassekameratar og vennar. Foreldra såg eit liv i isolasjon og einsemd, men var forundra over at Mats sjølv så ofte var glad. Grunnen til dette var at Mats i mange av døgnets timar transformerte seg til Lord Ibelin Redmoore og drog til planeten Azeroth – ein planet med kontinent og land, hav og skogar, byar og landsbyar. Men dette fekk ikkje foreldra vite før folka frå den planeten dukka opp i gravferda hans.