Det har vorte varsla at satsinga på havvind vert stadig dyrare. Dermed er det usikkerheit knytt til om den planlagde elektrifiseringa av norsk sokkel må skje ved å kople oljeplattformane på straumnettet på land i staden.

Då regjeringspartia og SV presenterte revidert nasjonalbudsjett i Stortinget i går, kunne dei varsle at dei held fram med havvindplanane, trass dei sterkt veksande prisane.

– Vi har ein felles ambisjon og mål om at elektrifiseringa skal gjennomførast med havvind, seier finanspolitisk talsperson i SV Kari Elisabeth Kaski til Klassekampen.

Mange vart skuffa då Equinor skrota planene om å elektrifisere oljefelta Oseberg og Troll ved hjelp av eit stort havvindanlegg som skulle stå klart i 2027. Dei skulda på at prisane har auka for mykje.

SV likte dårleg avgjerda til Equinor, og meiner at energiselskapet sjølve må bidra meir med pengar for å sikre utbygging av havvindprosjekta som skal elektrifisere sokkelen.

SV ønska avgifter

I forhandlingane med Arbeidarpartiet og Senterpartiet har SV prøvd å få gjennomslag for at oljeselskapa skal påleggjast ulike avgifter for å få fortgang i havvindutbygginga og elektrifisere meir av sokkelen med havvind enn kraft frå land.

– Det var ikkje mogleg å få med Ap og Sp på det no, men eg opplever ikkje at dei har avvist det endeleg. Så er det klart at vi også har vore opne for andre verkemiddel, som å stille krav til oljeselskapa. Det konkrete må vi kome tilbake til om eit år, seier Kaski.

– Men tyder dette punktet at færre oljeplattformer vil bli elektrifisert med kraft frå land enn det regjeringa har lagt opp til?

– Det er SV sitt utgangspunkt, og det er den einigheita me i praksis har med Ap og Sp. Elektrifiseringa skal i størst mogleg grad skje med havvind. Det vil også vere ei raskspor for å bygge ut meir havvind på sokkelen. Me veit at det går for seint i dag.

– Er det ein føresetnad at oljeselskapa betalar for det?

– Oljeselskapa må stille opp og betale ein del av rekninga, seier Kaski, som legger til at staten kan bidra med nokre deler av investeringane.

Ho seier grunnen til at dette kjem i revidert budsjett, er at det var viktig for dei å finne grep no som kunne få fortgang i havvindutbygginga.

– Vi var i ein situasjon no der Trollvind vart sett på pause av Equinor, og vi behandla havvindutbygging i Stortinget. Vi ser at mykje av verkemidla der kjem til å ta lang tid. Derfor var det viktig for oss å finne spor no som gjer at vi kan få forsert havvindutbygginga, seier Kaski.

Finanspolitisk talsperson i Senterpartiet Geir Pollestad er oppteken av at revidert nasjonalbudsjett ikkje er riktig tidspunkt å endre korkje skattepolitikken eller oljepolitikken, og at det difor uansett ikkje var snakk om å kome med nye krav til oljenæringa i Stortinget i går.

– No treng olje- og gassnæringa stabilitet, og det er difor vi har vorte samde om å ikkje kome med nokre nye skattejusteringar til næringslivet i dette reviderte budsjettet, seier Pollestad.

Ap trur på havvind

Finanspolitisk talsperson i Arbeidarpartiet Eigil Knutsen seier at dei tre partia er samde om at målet er at elektrifiseringa skal skje med straum frå havvind, sjølv om prisane er høge.

Han vil ikkje seie så mykje konkret om korleis dei skal få det til.

«Elektrifiseringa skal gjennomførast med havvind.»

— Kari Elisabeth Kaski (SV)

– No har vi gitt ei marsordre til regjeringa om at elektrifiseringa i størst mogleg grad skal skje med havvind, og så må dei kome attende med ei vurdering av kva tiltak som kan få det til å skje.

– Kan det vere aktuelt med eit tiltak som å la oljeselskapa betale meir av rekninga for havvindprosjekta?

– No har vi sendt ei bestilling om at regjeringa må greie ut tiltaka, så må vi kome attende til det, seier Knutsen.

Miljøpartiet dei grøne har på si side allereie konkludert med at dei er skeptiske

– Spørsmålet er om oljeselskapa skal betale for det sjølv, eller om dette er enda ein måte å subsidiere olja på, seier MDGs Lan Marie Berg.

MDG meiner oljeselskapa må påleggjast å betale hele rekninga for elektrifisering av oljeplattforma med havvind.

– Eg forventar at staten ikkje skal betale for det. Dette er oljeselskapa sitt ansvar. Dersom de skal fortsette å drifte, må de kunne gjere det utan utslepp og betale for sine egne utsleppskutt sjølv, seier Berg.

Framstegspartiet er uroa over signala frå SV og regjeringspartia. Finanspolitisk talsperson i Frp Hans Andreas Limi seier at å elektrifisere sokkelen med straum frå havvind vil koste mykje pengar.

– Dette vil jo bli eit subsidiesluk, og ei elektrifisering ved hjelp av havvind vil kunne koste i alle fall hundre milliardar kroner i subsidiar, seier han.

Dersom oljeselskapa skal byggje havvind, må det vere fordi dei sjølv ser at det løner seg, meiner han.