«Nu är det trendigt att klä sig som en fattig» melder Aftonbladet. Dei rike vil ta del i nedgangstidene på sitt vis med «poverty chick». Dyre «distressed jeans» med fabrikklaga slitasje og hol på knea, er ikkje nytt i motebildet, men dei siste åra har luksusmerker som er populære hos rapparar og ungdommar, som Gucci og Balenciaga, også lansert «skitne» joggesko og svindyre vesker som har vore blåkopiar av Ikea-bagen. At produkta har vorte møtt med kritikk har ikkje hindra nye variantar av «poverty core», som det heiter i Tiktok-lingo, frå å dukka opp og bli kjøpt av dei som ikkje treng tenkja på straumrekning eller inflasjon. No er det skautet, knytt på bestemorvis under haka, som er «perfekt i lågkonjunktur», ifølgje ein motehistorikar SVT har snakka med. A$AP Rocky leia an Gucci-Babushka-stilen, og Vogue har knyte-instruksjonar i arkivet. Fattigdom som accessoirer må opp på nidstonga. GK