Det er kongelege tider i nord. Ikkje minst er reiselivet sine folk i feststemning. Sjølvaste Sarah Ferguson, hertuginna av York som var gift med prins Andrew, har vore i Tromsø saman med døtrene Eugenie og Beatrice. Det største bladet i nord, «en ærlig talsmann for smaafolks sak», har over fleire sider fortalt oss om gjestane. «Fergie» med fylgje har opplevd magien, nordlyset. Dei har også vore på kvalsafari, og etter det er dei svært nøgde med den norske kvalpolitikken. Men meir enn det, også forvaltninga av silda. Det trass i at sildestammen er på veg nedover. Den vårgytande silda har mista si MSC-sertifisering som følgje av manglande internasjonale avtaler. Dessutan, i kjenslerus skryt hertuginna av norsk klimapolitikk. Statsråd Barth Eide må vera himmelfallen.