Det har blitt debatt etter at Avisa Oslo melde at to tidlegare partileiarar i Frp – Carl I. Hagen og Siv Jensen – arva høvesvis 250.000 kroner og eigedommar til ein anslått verdi av 27 millionar kroner frå ein for dei fleste ukjend bankdirektør. Thor Bang døydde i mars, 97 år gammal.

Siv Jensen, som gav seg med politikk i fjor, har ikkje svart på Klassekampen sine førespurnadar. Hagen, som framleis er stortingsrepresentant for Frp, seier til Avisa Oslo at han openbert har blitt lønna for godt arbeid.

– Veldig underleg sak

Stortingsrepresentant for Frp Christian Tybring-Gjedde seier at han ikkje har ei meining om dei arva pengane, men ønsker at Siv Jensen skal vere open om det.

– Eg har aldri høyrt om sånne avtalar tidlegare, så det får ho svare på. Eg kjenner ikkje detaljane rundt det. Det er jo eit dilemma her. Ho har arva desse pengane gjennom eit testament. Det er klart det kjem ein del spørsmål då. Eg trur ikkje ho har hatt fordelar av å vere finansminister.

Han legg til at han sjølv ikkje har fått nokon pengar.

– Det er greitt å avklare forholdet. Det kjem nok ikkje som ei total overrasking for ho. Det er ei veldig underleg sak, og eg synest ho skal vere open om kva ho trur er grunnen.

Dagsavisen meinte på leiarplass at det er av offentleg interesse korleis dei politiske arvingane forvaltar pengane sine. Det førte til reaksjonar, blant anna frå leiaren av tankesmia Civita, Kristin Clemet, som meinte det var tendensiøst av Dagsavisen. Avisa meiner at Jensen burde dele pengane med det gamle partiet sitt, men Tybring-Gjedde er ikkje einig.

– Nei, det synest eg ikkje. Skal du begynne med sånn type ting, vil folk tenke at det er ei kopling. Eg trur ikkje Bang har hatt nokon personleg vinning på Frp i regjering. Men dette blir berre spekulasjonar. Siv kan vere open om det.

– Han har vel fått ein del skattelette gjennom politikken dykkar?

– Det trur eg ikkje. Han verka ikkje som ein person som var opptatt av pengar. Då kunne han like gjerne gitt det til Høgre. Eg ser ikkje stor forskjell i den skattepolitikken vi har ført, og andre regjeringar.

«Det er greitt av å avklare forholdet. Det kjem nok ikkje som ei total overrasking for ho»

— CHRISTIAN TYBRING-GJEDDE, FRP

– Har du nokon tankar om kva ho bør bruke pengane på?

– Nei, det har eg ikkje. Alt dette får ho vurdere. Eg antar at ho har fått desse pengane på heilt legalt vis. Det er vel ikkje så skummelt at ho ikkje kan vere open om det. Ho må gjere det som ho synest er riktig.

Meiner det er privat

Klassekampen har snakka med andre stortingsrepresentantar frå Frp. Mange ønsker ikkje å kommentere saka, mens andre meiner at dette er ei privatsak, deriblant Himanshu Gulati.

– Det er ei privatsak for alle i Norge kven ein ønsker å gi sine midlar til. Det er hyggeleg at han har sett pris på arbeidet til Siv.

Til VG viser Jensen til testamentfullbyrdar Jan-Erik Sverre.

– Bang var tydeleg på at eg ikkje skulle bidra til offentlegheit om hans testamentere disposisjonar, så eg har ikkje lyst til å seie så mykje meir enn det for å respektere avdøde sitt ønske, seier ho til avisa.