Under nedstenginga i mai 2020 las eg Lawrence Wrights pandemithriller «The End of October», ein researchbasert roman bygd på ideen om ei ny spanskesjuke i den globale tidsalderen. Motsett USAs regjeringspolitikarar hadde Wright lese og forstått statlege risikorapportar og beredskapsplanar. «The End of October» kunne difor treffsikkert føresjå korleis mange styresmakter kom til kort mot den verkelege koronapandemien. Det thrilleren bomma på, var den siviliserte responsen frå vanlege borgarar. Wright skildrar ein alles kamp mot alle, men vi fekk det motsette. Vil tiltaka mot den femte smittebølgja endra på dette? I Noreg ser vi i alle fall sterkare offentleg dissens mot politiske vegval, ein halvorganisert protest frå hardt råka næringar og rein fortviling i førstelina.