I går redda SV byrådet i Bergen. Utan budsjettavtale med SV og Senterpartiet hadde det vore over ut for eit byråd med eit tynt parlamentarisk grunnlag. Same dag presenterte Bergens Tidende ei meiningsmåling som synte at byrådspartia, med unntak av MDG, alle går attende i høve til valresultatet. For både KrF og Ap er resultatet noko av det dårlegaste som er målt for partia. Den elendige målinga kjem på toppen av eit valresultat som ikkje var stort å skryte av. Ap, KrF og Venstre, som danna fleirtalsbyråd i 2015, gjekk frå 34 av 67 plassar i bystyret til berre 17 plassar etter valet i haust. At partia fekk halde fram og styre byen, kan dei takke valresultatet til Raudt, SV og MDG for. Også må vi ikkje gløyme Folkeaksjonen nei til mer bompenger (FNB) som stal så mange røyster frå Høgre at høgresida ikkje vart eit truverdig byrådsalternativ for sentrumspartia.