Ut mot Solberg
Tajik stussar over grøn skatt-utspel:
– Dersom statsminister Erna Solberg (H) meiner effekten av avgiftsfritaket på elbil er perverst, så er eg nyfiken på kva omgrep ho har tenkt å bruke om sine eigne kutt i formuesskatten.
Det seier nestleiar i Arbeidarpartiet Hadia Tajik til Klassekampen.
Tysdag skreiv Klassekampen at Solberg meiner fordelingseffekten av grøne skattar er «pervers».
«En diskusjon som er helt relevant, er fordelingseffekten på skattlegging av grønne ting. Det er ganske perverst hvis du ser på fordelingseffekten» sa statsministeren. Ho opna samstundes for å sjå på skattesystemet for å motverke auka ulikskap.
Utspelet har fått Ap sin nestleiar til å stusse.
– Då eg las dette, sette eg kaffien lite grann i halsen, seier Tajik.
Ho meiner Solberg skyv grøne skattar framføre seg i debatten om ulikskap.
– Regjeringa har etter kvart blitt nøydde til å erkjenne at ulikskapane aukar. Først skuldar dei på innvandring og blir sett på plass av SSB som seier at det er meir samansette årsaker som ligg bak. At det også handlar også om politikken som blir ført. No er det altså grøne avgifter som blir forklaringa. Altså eit avgiftsregime som statsministeren sjølv har vore med på å rigga.
Formuesskatt
Tajik seier at det ikkje bør kome som ei overrasking på statsministeren at grøne skattar kombinert med skattekutt til dei rikaste kan bidra til å auke skilnadane mellom folk.
– Når regjeringa legg flate avgifter som rammar alle og gjev store skattekutt til dei rikaste på toppen, så er det klart at det forsterkar ulikskapane.
– Ap er også for dei grøne skattane som statsministeren seier kan får pervers fordelingseffekt?
– Ja, det stemmer at vi ganske langt på veg har vore med på dette. Det handlar om at vi ser at det å gjere det enklast mogeleg å ta klimavennlege val for den enkelte familie, også bidrar til at det blir et reelt alternativ for fleire.
Ho seier Ap «alltid vil vere opne for å gjere endringar i grøne skattar som gjer at dei slår meir utjamnande ut».
– Til dømes har ei storsatsing på kollektivtransport ført til auka bompengeprisar ein del stader i landet. Vi har saman med andre parti vore pådrivarar for å få på plass vegprising, som vil vere meir rettferdig fordelt. Der burde Solberg tatt ein prat med Frp, som så langt er det einaste partiet som har vore negative til vegprising.
Legitime skatteauke
Tajik seier grøne skattar har mindre å seie for ulikskap enn regjeringa sine kutt.
– Provenyeffekten av avgiftsfritak på elbil svarar til 4,2 milliardar kroner. Medan provenyeffekt av kuttet i formuesskatten åleine, er på 6,9 milliardar kroner.
– Ap vil ta inn 15 milliardar meir i skatt. Er det nok for å bøte på den veksande ulikskapan i samfunnet?
– Når ein seier at det er behov for å betale meir i skatt fordi folk fortener velferd av god kvalitet, så er det viktig at det bodskapen har legitimitet. Ein kan gå til val på enda høgare skattar, men eg er ikkje sikker på at det ville hatt legitimitet i befolkninga. Vår tilnærming er å gjere den vurderinga.
– SV og Raudt er i vekst. Dei vil seie Ap er for lite offensive i kor mykje skattar de vil ta inn for å bøte på ulikskapane?
– Mitt spørsmål tilbake vil vere om de føler at de har støtte i den norske befolkninga som gir dei legitimitet til å gjennomføre politikken sin.
Høgre: liten skilnad med Ap
Stortingsrepresentant Vetle Wang Soleim (H) skriv i ein e-post til Klassekampen at statsministeren tek opp ein viktig debatt. Når det kjem til grøne skattar er det mange omsyn å ta, legg han til.
«For eksempel foreslo Høyre og Fremskrittspartiet å differensiere elbil-fordeler på vekt, slik at de tyngste bilene, for eksempel Tesla, ikke ville få fullt avgiftsfritak. Men da kom hensynet til det å være miljøvennlig også i distriktene der avstandene er lange inn, og man vedtok derfor ikke forslaget. Men fortsatt gagner dette alle de med god råd i sentrumsnære strøk med korte avstander. Det er dette som kan være perverst».
Solheim hevdar Ap sitt budsjettopplegg ikkje ville hatt mykje å seie for dagens nivå på ulikskapen.
«Hadde vi fjernet hele formuesskatten ville landets 10 prosent rikeste gått fra å betale rundt 39,6 prosent av alle personskatter til å betale rundt 39,0 prosent. Med Arbeiderpartiets budsjettopplegg hadde ulikheten i Norge vært omtrent den samme som med dagens regjering», skriv han.
