Då det vart klart at Steve McQueen skulle laga spelefilm av den britiske tv-serien «Enkene», var det vanskeleg å halda forventingane på eit nøkternt nivå. Særleg sidan regissøren bak «Hunger», «Shame» og «12 Years A Slave» grunngav prosjektet med at serien hadde gjort uutsletteleg inntrykk på han i ungdommen. Det var lett å kjenna seg att i. Kva kunne sameina ein urban, svart, London-gut og ei kvit, norsk, bygdejente? Ein svært spanande ranskrim med kompliserte kupp-planar, løgnaktige roller og stadig overraskande vendingar? Opplagt. Men kanskje også det uvanlege synet av usynleggjorde menneske, som bryt gjennom avmakt og stiller seg sjølve i sentrum for eigne liv.