I dag opnar den 71. internasjonale filmfestivalen i Cannes. 50 år etter regissøropprøret i 1968 slit festivalorganisasjonen framleis med å ta samtida på pulsen. Symbolsk nok er den fremste rebellen frå 1968, Jean-Luc Godard (i sitt 88. år!), tilbake i hovudprogrammet med filmessayet «Le Livre d’Image» («Bildeboka»). Godards alderdomsfilmar er ikkje uinteressante, men som nyskapande filmkunstnar og politisk opprørar er ikkje Godard i nærleiken av posisjonen han hadde då han laga «Pierrot le Fou» (1965), filmen som har inspirert årets Cannes-plakat. Godard og Godards historie(!) har skifta plass i Cannes-vektskåla, der det seremonielle blir halden opp mot det aktuelle. Det ville neppe den unge Godard akseptert.