For ikkje så lenge sidan gjekk eg åleine gjennom gatene i New Orleans, mellom husa i pastellfargar med fargerike perlekjeder hengande på dører, karmar, over syklar. Gull, lilla, grønt. Natta før hadde eg gått frå bar til bar, det var siste kveld av Jazzfest, funk- og soulbanda spelte i bule etter bule, hattane blei sende rundt, på slutten av kvelden skjedde det plutseleg, lokalet blei smekkfullt, funkbandet på scenen drog inn musikarar frå gatene, publikum gjekk bananas, vi dansa heile natta.