Leiar i Noregs Mållag Marit Aakre Tennø byr på forseinka frukost og rikeleg med nytrekt kaffi ved kjøkkenbordet i Jostedalen, der ho har budd med familien mellom bratte fjell dei siste åra. På bordet er det brød, ost og leverpostei, lys i adventsstaken, to julekalendrar – ein til kvar av dei to sønene – og ein adventsappelsin med nellikspikrar. Utanfor vindauga ligg nysnøen djup, og langs husveggen finst eit godt utval i ski, kjelkar og eit par sparkstøttingar.